AMARG 103

Photo Kayaki

ḥmd i-rbbi 

 

1  ḥmd i-rbbi a-ul-inu,

       ula kullu ma-gigi-illan,

       tmjjdt ism-ns iɛzzan.

2  ḥmd i-rbbi a-ul-inu,

       a-ur-tttut kullu timih̬ar-ns.

3  ar-ak-itṣamaḥ f-kullu ddnub-nnk.

       ar-ijjujji kullu timuḍan-nnk.

4  ar-issinif ddat-nnk i-umḍḍal.

       ig-ak ttaj n-rrḥmt d-tayri-ns.

5  ibark kullu ussan n-tudrt-nnk.

       irar-ak-d afud-nnk zund jjhd l-lbaz.

6  ibidd bdda d-yan-f-iḍr lbaḍl,

       iḥkam s-lḥqq ifk-as taġamt-ns.

 

7  rbbi imla i-musa ma-iqṣad,

        yadj mddn-ns ad-ẓrran ma-iskar.

8  rbbi a-igan arḥim ig aḥnin,

        yigat ṣṣbr-ns d-tayri-ns izgan.

9  ur-ra-n-itqama bdda ġ-lġaḍab,

        ur-rad-aġ-ig d-willi iḥaša.

10 ur-rad-bdda-itẓi f-ddnub-nnġ,

        ula-da-yaġ-yakka f-unšk lli-sthllan.

11 tigat tayri-ns f-willi-t-ituqqarn

        unšk lli-attuyn ignwan f-wakal.

12 issaggug-n fllannġ ddnub-nnġ

        unšk lli-yaggug lġrb zġ-ššrq.

13 iḥnnu ġ-ġwilli-t-ituqqarn

        ġmklli itḥnnu yan ġ-tarwa-ns,

14 ašku issn ma-zġ-ntyawskar,

        yissan izd akal a-nga nkkʷni.

 

15 hati zund tuga ad-zrayn-uwssan-nnġ.

        nmġi-d nimġur zund ajddig n-tagant,

16 iṣuḍ-d-waḍu yawi-t,

        laḥ ajddig ih̬wu-udġar-ns.

17 imma tayri n-rbbi ur-dars ttmi,

        tili dima f-willi-t-ituqqarn.

    ar-bdda-iskar s-ufulki-ns izgan,

        i-kullu tasutin n-mddn-ns,

18 i-willi umẓnin ġ-lɛhd-ns,

        awin-tt bdda ġ-luṣiyat-ns.

19 iḥkam rbbi kullu ma-illan,

        iskr lɛrš-ns ġ-iggi n-ignwan.

 

20 ḥmdat i-rbbi a-lmalayka tjhhdnin,

        kunni da-isflidn i-iwaliwn n-rbbi,

        ar-kullu-tskarm s-mad-awn-ittini.

21 ḥmdat i-rbbi a-inmġurn n-ignwan,

        kunni da-iskarn ma-gigun-ittiri.

22 ḥmdat i-rbbi a-kullu lmh̬luqat

        ġ-kraygatt mani ġ-ddu-ufus-ns.

    ḥmd i-rbbi a-ul-inu.