AMARG 139

Photo Jerzy Strzelecki

tawassna  

 

1     wa-rbbi tẓrit agʷns-inu tissant-iyi,

2         tissant iġ-gawrġ ula iġ-nkrġ,

                 tissand-d zġ-tuggugt ma-ġ-a-swingimġ.

3         tissant iġ-ffuġġ ula iġ-gnġ,

                 tissant a-rbbi kullu mad-skarġ.

4     ur-ta-immuss ils-inu,

           tssnt a-rbbi kullu ma-rad-iniġ.

5      tsutlt-iyi bdda zġ-kraygatt tasga,

           tḥṣart flla s-jjhd n-ufus-nnk.

6      tɛjjbġ a-rbbi ġ-twassna-yad-nnk,

           tattuy bahra flla ur-as-ẓḍarġ.

 

7     manis rad-dduġ ad-anfġ i-rruḥ-nnk?

       ula manis rad-rwlġ ad-fllak-rgsġ?

8         iġ-ġliġ s-ignna, ġin a-ġ-tllit kiyi.

                 iġ-gnġ ġ-umḍḍal ula ġin tllit gis.

9         iġ-nkrġ aylġ s-usġlay n-tafukt,

                 ula ġin afus-nnk a-ra-yyi-iguwwd.

10        iġ-bbiġ amda zdġġ-n ġ-tsga yaggugn,

                 ula ġin ra-yyi-gis-yamẓ-ufus-nnk afasi.

11        iġ-ḍalbġ tillas a-yyi-dlnt,

                  ġ-iẓri-nnk a-rbbi ur-akkʷ-llasnt.

12        iġ-ḍalbġ azal a-ywrri ig iḍ,

                  ġ-dark a-rbbi iga iḍ zund azal,

                  tillas ula tifawt yan ad-gant ġ-dark.

 

 

13    kiyi a-iskrn igzman n-ddat-inu,

       tzzdit-iyi-n s-tntla ġ-waḥlig n-immi.

14        ḥmdġ-k f-lquwwa-nnk ula lmjd-nnk.

                  issanġ iskkirn-nnk lɛjb ad-gan.

15    lliġ-iyi-di-th̬lqt ġ-tdrut n-ddunit,

       ur-fllak-ntiln ih̬san n-wazzan.

           tɛdlt iẓuran-inu ġ-uruku irgsn,

16            ar-iyi-tmnadt lliġ ur-ta-lulġ.

           tarat flla ussan n-tudrt-inu kullutt.

                   ġ-warra-nnk a-ġ-llan ur-ta-ẓriġ tifawt.

17    tɛjjbġ a-rbbi ġ-iswingimn-nnk.

       kraygatt kra illan ar-gis-tswingimt.

18        iġ-tn-kullu-ssmunġ rad-igatn f-umlal,

                   sul ur-rad-issanġ mamnk a-tgit kiyi.

 

19    amar yufan a-thlkt gar mddn a-rbbi,

           tssittit-n flla ġwid dar tɛzza-tnaġa.

20            rurn-in srk tiġurdin ar-gik-rggmn.

21    ur-a-tiḥmalġ ġwilli-k-ur-ittirin,

           ula ṣbrġ i-willi srk yusin tanuwwašt.

22            ur-a-tn-ttiriġ ula ra-sar-tn-iriġ.

 

23    wa-rbbi siggl gigi tissant ul-inu.

           arm-iyi tissant mad-swingimġ,

24            tẓrt is-gigi-illa kra yʷh̬šnn,

                tguwwdt-iyi-bdda ġ-uġaras idumn.