AMARG 32

tasaɛt n-taġuft   

 

1  ambarki a-iga wanna mi iṣamḥ rbbi f-ddnub-ns,

       issitti fllas ġaylli-t-issḥššamn.

2  ambarki a-iga wanna mi ur-iḥasb rbbi lmɛṣyat-ns,

       ula sul qaman irkan ġ-uwl-ns.

3  lliġ ur-ta-yak-qrraġ tmda-gigi-kullu-tdwast,

       ha-yyi ar-nddrġ ass kullut.

4  ġ-iyḍ ula azal iẓẓay-flla-ufus-nnk a-rbbi.

       ġmklli itsllaw-usġar ġ-ṣṣif iḥrran

       ad-sllawn ih̬san-inu.

5  d-ġakudan a-yk-nniġ mamnk ad-ffuġġ

    zġ-wawal-nnk,

       ur-sul-ḥḍiġ maylli-yyi-issrkan.

    iniġ-ak a-rbbi “tʷgraẓ-iyi f-maylli skrġ yʷh̬šn.”

       d-ġakudan a-rbbi a-flla-tssittit taẓayt n-ddnub-inu.

6  ġ-tasaɛt n-taġuft a-ġ-a-yk-n-aqran winnk,

       ur-ra-tn-tadjt a-tn-ilkm-unggay l-lɛqubit.

7  kiyi a-igan antal-inu tḥḍut-iyi ġ-tasaɛt n-tnukmut,

       tsutlt-iyi s-imurign n-sslamt.

 

 (yini-yyi rbbi:)

8        rad-ak-mlġ aġaras lli-k-id-iqqann,

          iniġ-ak ula mamnk a-gis-tfttut.

9        a-ur-tgm imddila zund agmar d-usrdun,

          ar-skarn s-ifaddn ma-ira siditsn,

          s-ulgammu d-twuriyt a-s-a-gisn-itḥkam.

 

10 ra-tigat-tguḍi i-willi rurnin tiġurdin s-rbbi.

    imma willi srs umnnin tayri-ns izgan ad-asn-ilullin.

 

11       frḥat s-rbbi tfrḥm s-uggʷar,

          kunni da-iftan ġ-uġaras n-ufulki.

          tallm awal-nnun tirirm i-rbbi,

          kunni da-iṭṭafn ul iṣfan.