AMARG 62

Photo Vialut

ur-sar-asusġ

 

1  rbbi waḥdut ad-dar-siggilġ asunfu,

       dars a-ġ-ṭṭafġ laman.

2  rbbi waḥdut a-igan ajarif-inu

       ig lbrj ig antal-inu,

            ur-sar-mmussiġ.

 

3  ar managu a-ra-tirim a-ttakʷlm f-bnadm,

       tirim a-yyi-tssḍrm zund aġʷrab ikʷnan,

            zund tabya ihrmn?

4  ar-kn-itɛjjab a-taddrm tikrkas,

       tskrm f-a-yyi-di-tgrm zġ-tarigt-inu.

            da-takkam tamimt s-ils

 imma ul iɛmmr s-wasmmum.

 

5  rbbi waḥdut ad-dar-siggilġ asunfu,

       d-nttan a-ġ-n-giġ rrja.

6  rbbi waḥdut a-igan ajarif-inu

       ig lbrj ig antal-inu,

            ur-sar-asusġ.

7  rbbi waḥdut a-ra-yyi-issbidd ġ-laman,

       d-nttan a-ra-issattuy ism-inu,

            ig ajarif izgan ig azwag-inu.

 

8  way-aytma tiqat ġ-rbbi kraygatt tasaɛt,

       tinim-as f-kullu ma-issġufun ul-nnun,

            nttan a-ġ-a-ntzawag.

 

9  hati amẓluḍ zund tunfust a-izray,

       imma bu-wayda tawargit ka-iga.

    ntni s-sin hatin fsusn f-yat-tunfust,

       ar-srsn-yaqlay lmizan.

10 a-ur-tbnnum s-ma-di-tkkism s-ifaddn,

       ula-da-ttawim rrja s-ma-di-tukʷrm.

            iġ-d-yuška lh̬ir iggutn a-ur-fllas-tskrm.

 

11 hati yat-twal isawl sidi rbbi,

       tis snat-twal sfldġ-as inna,

            nttan a-bdda-iḥkamn ġ-kullu ma-illan.

12         d-nttan ad-aġ-iran s-lḥnant-ns izgan,

            d-nttan a-ith̬llaṣn i-kraygatt yan f-ma-iskr.